25 SUGATAN SA KARAMBOLA NG 3 BUS

TINATAYANG aabot sa 25 ang sugatan matapos magbanggaan ang 3 bus sa Quirino Highway sa Barangay San Francisco, Lunes ng gabi.

Dinala sa ospital ang mga biktima, kabilang ang isang 8-taong gulang na pasahero habang ang mga driver ng nagsalpukang Philtranco bus na sina Ricardo Petallo at Virgillio Aurellano Jr. ay isinugod sa isang ospital sa Naga City.

Base sa inisyal na imbestigasyon, sinubukang mag-overtake ng isang Philtranco bus na galing Naga sa isang matarik at pakurbadang bahagi ng daan kaya bumangga ito sa kasalubong na Philtranco bus mula sa Maynila.

Bumangga rin ang kasunod na Elavil bus kaya humambalang sa daan ang tatlong malalaking sasakyan.

Ngunit giit ni Nelson Palmes, substitute driver ng Philtranco bus na galing Maynila, naunang bumunggo sa kanilang likuran ang Elavil bus kaya't nagsalpukan ang magkasalubong na Philtranco bus.

Haharap sa kasong reckless imprudence resulting to physical injuries and damage to properties si Petallo, ang drayber ng nagovertake na bus.