HANAP MO BA AY DYOWA?

ISA ka ba sa mga miyembro ng SMP o Samahan ng Malamig ang Pasko?
Ayon sa isang survey, kabilang ang buwan ng Disyembre sa mga mataas ang bilang ng mga nagkakadyowa o nag-aasawa.
Wala naman daw kinalaman sa lamig ng panahon tuwing magpapasko. Pero sa ilang napagtanungan ng The Buzzer Team, maraming single ang type magkadyowa sa ganitong panahon.
Mas ganado raw kasi silang magsimbang gabi.
Yong iba naman ay desperado lang talaga at gusto nang makahanap ng kanilang forever.
Ang mga taong ito ang madalas ay nahuhulog sa patibong ng masasamang loob.
Kaya naman ngayong palapit na naman ang panahon ng kapaskuhan, may babala ang pamunuan ng Philippine National Police (PNP) sa mga taong naghahanap ng kanilang lifetime partner.
Ginawa ng pulisya ang babala matapos na isang Overseas Filipino Worker (OFW) ang nalinlang  ng P600,000 ng taong inakala niyang kanyang 'forever'.
Paalala ng PNP sa publiko, partikular sa mga naghahanap ng lifetime partner sa Facebook at iba pang networking sites na mag-ingat sa pakikipag-ugnayan sa mga personalidad na nakilala lamang nila sa social media.
Kamakailan ay nabuwag ng mga operatiba ng PNP-CIDG ang isang online dating syndicate na ang huling biktima ay isang OFW  na nakunan ng P600,000  nang mahikayat na sumali sa online love matching scheme sa pagbabaka-sakaling magkaroon ng makakapareha sa buhay.
Ang biktima ay si Frederick, 23, isang OFW na nakilala sa Facebook ang isang alyas Angel, 20, ng Sampaloc, Manila pero ang ka-chat pala nito ay isang Angelika Miguel ng Sampaloc, Manila.
Isang ‘identity theft' ang pangyayari dahil ginamit lamang ng suspect ang account at mga larawan ni Angel upang makahanap ng mabibiktima.
Nagkaroon ng relasyon si Frederick at ang inakala niyang si Angel sa loob ng dalawang taon hanggang maengganyo siyang padalhan ito ng pera para makaipon sa kanilang pagpapakasal sa pag-aakalang tunay ang kanilang relasyon.
Ngunit matapos makapagbigay ng aabot sa P600,000 ay saka lang natuklasan ni frederick na sindikato pala ang kausap niya.
Nagpapanggap lang na magandang babae ang mga miyembro ng sindikato na gumagamit ng mga pekeng accounts at larawan.
"Actually yung  report on the romance scam, ito ay  increasing. Maraming nabibiktima rito. Some people believe that they are having a relationship with a foreigner and sometimes, it's too good to be true,”ayon sa isang opisyal ng pulisya.
Kaya naman paulit-ulit ang paalala ng PNP sa netizens na huwag ibigay ang mahahalagang impormasyon sa sinomang tao na hindi kakilala lalo na sa dating online dahil kadalasan ay scam ito.
Hindi rin dapat magbigay ng pera sa mga taong hindi lubos na kakilala at makabubuting magsagawa muna ng background checking  upang hindi maloko ng sindikato.
Naaresto na ang nanloko kay Frederick at patuloy na iniimbestigahan dahil sa posibilidad na marami na itong naloko. Pinaghahanap na rin ang iba pang kasamahan sa sindikato ng suspek.

SINO ANG PUMATAY SA CO-ACTOR NI COCO MARTIN?

SINO ang pumatay kay Arnold Corpuz?

Si Corpuz ang Kapamilya actor na natagpuang walang buhay at tadtad ng saksak sa bahay nito sa Silang, Cavite.

Ayon sa mga kaanak ng 38-anyos na aktor, noong Lunes pa nila hindi matawagan si Corpuz kaya Miyerkules ng gabi ay nagpasya silang pasukin na ang bahay nito sa Brgy. Biga 1, Silang, Cavite.

Nadatnan nilang tadtad ng saksak ang katawan ni Corpuz sa sala ng bahay.

Nakasuot lamang ito ng underwear at medyas.

Mag-isa umanong naninirahan sa nasabing bahay ang biktima pero madalas itong may bisita.

Ayon sa Cavite police, may natagpuan na tatlong baso at alak sa balkonahe ng bahay na indikasyon na mayroon itong mga kasama bago nangyari ang krimen.

Dito rin nadiskubreng nawawala ang dalawang cellphone at mga alahas ng biktima kaya maaaring pinagnakawan ito.

Si Corpuz ay gumanap na alkalde na nabiktima ng ambush sa “Ang Probinsyano” na pinagbibidahan ni Coco Martin. Gumanap din ito sa Bagani at iba pang teleserye sa Kapamilya network.

Sa ngayon ay nangangapa pa ang mga awtoridad kung sino ang huling nakasama ng biktima bago ito natagpuang patay.

Sino nga ba ang pumatay kay Arnold Corpuz?

CJ RAMOS, CHILD STAR NOON, ADIK NA NGAYON

NATATANDAAN pa ba ninyo ang makulit na batang si Budoy sa Ang TV Movie: The Adarna Adventure? O ang binatilyong si John John sa pelikulang Tanging Yaman?

Siya si CJ Ramos o Cromell John Ocampo Ramos na 31-anyos na ngayon.

Nitong Hulyo 31, taong ito, ginulat ni CJ Ramos ang kanyang mga fans nang bumalandra sa mga telebisyon ang kanyang mukha. Wala na ang bakas ng isang makulit at bibong bata o ang seryosong binatilyo na natunghayan nila noon sa telebisyon at pelikula.

Nakasuot ng dilaw na T-shirt at may posas na si CJ.

Ito ay makaraang maaresto siya ng mga tauhan ng Northern Police District (NPD) sa buy-bust operation sa Quezon City.

Nadakip ng mga operatiba ng Station Drug Enforcement Unit (SDEU) ng Caloocan police ang aktor, alas-10:50 ng gabi sa Tandang Sora St., ilang minuto matapos niyang bumili ng isang sachet ng shabu kay Louvella Gilen, alyas “Jacky”, 36, ng Block 3 Morning Star Drive, Sanville Subdivision.

Agad sumailalim sa drug test at inquest proceedings sa Quezon City Prosecutors Office ang aktor at kanya umanong supplier at nagpositibo ang mga ito sa paggamit ng droga.

Si Gilen ang target ng police buy-bust operation na naaresto matapos magbenta ng shabu sa pulis na nagpanggap na buyer kapalit ng P500 marked money, habang dinakip naman si CJ matapos makuhanan ng isang plastic sachet ng hinihinalang shabu.

Inamin umano ni CJ kay Chief Supt. Eleazar na nagsimula siyang magdroga sampung taon na ang nakararaan subalit, nagpaplano nang mamuhay ng normal bago muling natukso na bumili ng isang sachet.

Kabilang sa mga naging pelikula ng aktor ang Cuchera (2011) at Exchange (2012).

Ilang ulit din siyang naging nominado sa FAMAS bilang Best Child Performer, Best Child Actor at nagwagi sa kategoryang Best Performance by Male or Female, Adult or Child, Individual or Ensemble in Leading or Supporting Role ng Young Critics Circle Award sa kanyang ipinamalas na galing sa pag-arte sa pelikulang Tanging Yaman taong 2000.

Walang direktang maisagot ang aktor kung bakit siya nagdodroga.

Tanging nasabi niya ay nagsisisi siya, pero huli na.

Si CJ at ang kanya umanong supplier ng shabu nang iharap sa mga mamamahayag sa tanggapan ng NCRPO.

NAGNAKAW NG SAPATOS NI GERALD ANDERSON BUGBOG-SARADO

BUGBOG ang inabot ng isang construction waorker matapos siyang mahuling nanloob sa bahay ng actor na si Gerald Anderson sa Quezon City.

Naharang ng mga tambay ang papatakas sanang si Mark Joseph Capalla, 22-anyos at hindi ito nilubayan ng bugbog hanggang dumating ang mga awtoridad.

Kwento ng personal assistant ng actor na si Jalil Laidan, alas-9 ng gabi nang pasukin ng suspek ang bahay ni Anderson sa Katipunan Extension, Vista Real Classica 1, Batasan Hills, QC.

Napansin umano ni Laidan si Capalla na nagkukubli sa tabi ng sasakyan ni Anderson kaya sinita nila ito ng kanyang kasama. Nagtatakbo si Capalla kaya hinabol nila hanggang makita sila ng ilang nakatambay sa lugar na humarang sa suspek kaya hindi na ito nakatakas.

Nabawi raw sa suspek ang mamahaling sapatos ni Anderson at ilang T-shirt ng mga staff nito.

Wala nang planong magdemanda pa si Anderson lalo pa't nabawi naman ang kanyang sapatos pero ang kanyang PA na si Laidan ay tuloy ang pagsasampa ng kasong Theft sa suspek.

Diumano, ang suspek ay anak ng dating katiwala ng aktor.

MAG-INGAT SA ALOK NA TRABAHO SA CANADA

NAGBABALA ang Department of Labor and Employment (DOLE) sa publiko laban sa alok na trabaho bilang mushroom pickers sa Canada.

Ayon sa DOLE, walang katotohanan na nangangailangan ang Canada ng 700 mushroom pickers, na may kapalit na kita na P150,000 kada buwan.

Sa kanyang ulat kay Labor Secretary Silvestre Bello III, sinabi ni Labor Attaché I-designate Celeste Marie Ramos ng Philippine Overseas Labor Office (POLO) sa Toronto na walang 700 job orders para maging mushroom pickers sa Canada.

Masyado rin aniyang malaki ang P150,000-P180,000 na monthly pay para sa isang typical mushroom picker, dahil ang ganitong uri ng trabaho ay karaniwang may minimum wage sa  Ontario at iba pang lalawigan.

Sinabi rin ni Ramos na karaniwan ring prayoridad ng Canadian government na mabigyan ng trabaho ang kanilang mga mamamayan, kaysa mga dayuhang manggagawa.

Pinaalalahanan din ng DOLE ang mga job seekers na maging maingat at kumpirmahin muna sa pamahalaan kung legal ang iniaalok sa kanilang trabaho bago ito tuluyang sunggaban upang hindi mabiktima ng illegal recruiters.

PHIL. AMBASSADOR SA KUWAIT NAPIPINTONG MAPATALSIK

DELIKADONG mapatalsik sa Kuwait ang Philippine ambassador sa naturang bansa matapos mabuking ang ginagawa niyang pagtulong sa mga Pinay na makatakas mula sa malulupit na amo.

Ito ay matapos mag-viral ang video ni Philippine ambassador Renato Pedro Villa na nakikipagtulungan sa inaabusong Pinay.

Dahil sa kumalat na video, agad pinatawag ng Kuwait Foreign Ministry si Villa upang ibigay ang dalawang  diplomatic protest notes.

Diumano, may ilang miyembro ng parliament ng Kuwait ang humihiling ngayon na mapatalsik si Villa.

Inaasahan naman na lalo itong magpapalaki sa lamat sa relasyon ng Pilipinas at Kuwait na kamakailan ay nagkainitan matapos pairalin ang total ban ng pagpapadala ng mga Pinoy na manggagawa sa nasabing bansa dahil na rin sa maraming kaso ng pang-aabuso roon partikular sa mga Pinay.

Matatandaang naging kontrobersyal ang kaso ni Joanna Demafelis, ang Pinay maid na pinatay at iniwan sa freezer ng kanyang mga amo.

80K TRABAHO PARA SA MGA FILIPINO

HALOS 80,000 local at overseas job openings ang iaalok sa mga jobseekers sa isasagawang nationwide job at business fair,  na idaraos ng Department of Labor and Employment (DOLE) sa Labor Day sa Mayo 1.

Ayon kay Labor Secretary Silvestre Bello III, posibleng madagdagan pa ang naturang bilang ng employment opportunities sa 53 sites na pagdarausan ng Trabaho, Negosyo, Kabuhayan (TNK) job at business fairs, na inorganisa ng kanilang tanggapan, katuwang ang Department of Trade and Industry (DTI).

Sinabi ng kalihim na ito ang pamamaraan ng gobyerno upang mabigyan ng pagkilala at parangal ang mga manggagawang Pinoy sa pagdiriwang ng Labor Day.

Nabatid na kabuuang 829 employers, na binubuo ng 666 local at 163 overseas employers, ang lalahok sa naturang job fair at magkakaloob ng may 78,675 local, overseas, at government jobs.  

Kabilang umano sa mga top local jobs na may pinakamaraming vacancy ay mga sundalo (AFP/PNP) –4,002; customer service representative – 1,470; production worker/factory worker – 1,443; mason (finishing/rough) – 1,385; call center agent – 1,306; production machine operator – 1,288; construction worker – 900; BJMP (government) – 889; service crew – 880; at karpintero (finishing/rough) – 708.

Para naman sa overseas employment, karamihan sa mga bakanteng trabaho ay nurses – 3,988; technician – 1,546; food and beverage staff – 689; engineers (mechanical, electrical, civil) – 344; production worker/ factory worker – 300; sales associate professional – 200; construction worker – 200; assistant head manager – 174; cook – 157; driver (general) – 150; at housekeeping attendant – 123.

Sa National Capital Region (NCR),  mayroong 18 job at business fair sites na matatagpuan sa Valenzuela Astrodome, Valenzuela City; SM Tunasan, Muntinlupa City; Taguig City; SM Bicutan; SM Sucat, Paranaque City; SM BF, Paranaque City; Robinsons, Las Pinas City; SM Center, Las Pinas City; SM Southmall, Las Pinas City; Pasig City (April 27); SM Marikina City (date to be determined); San Juan City (April 21); SM Megamall, Mandaluyong City; SM Manila, Manila City; SM San Lazaro, Manila City;  Cuneta Astrodome (May 10); Quezon City Hall grounds; at Fisher Mall, Quezon City (date to be determined).

Sa Luzon, ang mga TNK sites ay matatagpuan sa Baguio City National High School – Main Campus sa Cordillera Administrative Region; SM City Rosales, Pangasinan; Robinsons Ilocos Norte; Pangasinan PESO Compound, Lingayen in Region 1; Robinsons Mall, Santiago City, Isabela; SM City, Cauayan, Isabela; at SM Downtown Tuguegarao, Cagayan sa Region 2; Baler, Aurora; Balanga City, Bataan; SM City Marilao, Bulacan; SM City Cabanatuan, Nueva Ecija; SM City Downtown, San Fernando, Pampanga; SM City Clark, Angeles City, Pampanga; SM City Pampanga; SM City Tarlac; at Harbor Point Mall, Subic, Zambales sa Region 3.

Mayroon ding job at business fair sites sa Calamba, Laguna (Region 4A); Bansud, Oriental Mindoro at SM Puerto Princesa City, Palawan (Region 4B); SM City Naga at Pacific Mall, Legazpi City (Region 5).

Ang mga jobseekers sa Visayas region ay maaari namang bumisita sa TNK sites sa Marymart, Iloilo City (Region 6); IC3 Pavillion, Cebu City (Region 7); at Tacloban Convention Center, at Ormoc City Hall, Tacloban City (Region 8) habang sa Mindanao, ang mga job fair sites ay nasa Zamboanga Economic Zone, Talisayan, Zamboanga City; KCC Mall, Zamboanga City; City Hall Lobby, Isabela City; Plaza Luz, Pagadian City; at Ipil Municipal Covered Court, Zamboanga Sibugay (Region 9); Limketkai Center, Cagayan de Oro City (Region 10); Gaisano Mall of Davao at SM City Davao (Region 11); SM City General Santos (Region 12); at Hotel OAZIS, Butuan City, Agusan del Norte (CARAGA).

Ang 2018 Araw ng Paggawa ay gugunitain sa ilalim ng temang ‘Pagpupugay sa Manggagawang Pilipino: Dangal ng lahi, kabalikat sa progresibong pagbabago.’

SUICIDE NA NAMAN SA SM MALL

BINULABOG na naman ang isang sangay ng SM malls matapos tumalon sa kanyang kamatayan mula sa ikaapat na palapag ang hindi pa nakikilalang babae kahapon ng tanghali sa North Edsa, Quezon City.

Sa ulat na natanggap ni Quezon City Police District (QCPD) Director P/Chief Supt. Guillermo L. Eleazar, pasado alas-12:00 ng tanghali nang gulantangin ang mga tao sa paglagapak ng katawan ng babae sa SM North Annex building sa Barangay Sto. Cristo BB ng nasabing lungsod.

Ayon kay SPO1 Lorenzo Macaraeg ng QCPD Station 2, nakatanggap sila ng tawag mula kay Elyss Rodolfo Pa-nganiban, SM Supervisor Security Office at ini-report ang naturang insidente.

Isinugod pa ang biktima sa Quezon City General Hospital subalit idineklarang dead-on-arrival dahil na rin sa labis na pinsala sa ulo at katawan.

Ayon kay Panganiban, abala umano siya sa pagroronda nang makarinig nang tilian ng mga mallgoer at nang kanyang usisain kung ano ang pinagkakaguluhan ng mga ito ay tumambad sa kanya ang duguang babae.

Nabatid sa ilang saksi, napansin nila na tila wala sa sarili ang babae at umiiyak habang palakad-lakad sa mall. Bigla na lamang umano itong tumalon na ikinabigla ng lahat.

Diumano, bago nagpatiwakal ay bumili pa ng plastic na upuan ang biktima na tinatayang 30-anyos pataas, na kanyang ginamit na tuntungan bago tumalon.

Inaalam pa ng pulisya ang pagkakakilanlan ng biktima upang maabisuhan ang pamilya nito.

Matatandaan na ilang linggo pa lamang ang nakararaan ay isang kostumer din sa nasabing sangay ng SM ang pinatay ng nakaalitang technician.

Si Geroldo Ramon Querijero, 56, ay pinagsasaksak ng suspek na si Leo Laab, head technician ng PC Home Service Center na nasa 5th Floor ng SM City Annex Bldg., North Avenue, EDSA.

Nagtalo umano ang dalawa nang ipagpilitan ng biktima na kunin ang ipinagawang lap-top sa kabila na hindi nito dala ang kanyang resibo. Nang bumalik sa shop si Querijiro makalipas ang ilang oras at dala na ang kanyang resibo ay muli silang nagtalo ni Laab at doon na siya nito pinagsasaksak.

Ang patalim ay binili umano ni Laab sa kitchenware section sa loob ng SM bilang paghahanda matapos siyang bantaan na babalikan ng kostumer. Patuloy pang pinaghahanap ng mga awtoridad si Laab.

Buwan naman ng Oktubre noong isang taon nang mag-suicide din ang isang babae sa SM Megamall sa Mandaluyong City.

Dakong alas-3:15 ng hapon nang tumalon mula sa ikalimang palapag ng Building­ B ng Megamall ang babae at bumulusok sa basement.

Bago ito, may nakapansin din umano sa biktima na tila balisa habang naglalakad-lakad sa mall.

Noong Pebrero 14, 2016 ay isa ring malagim na trahedya ang nangyari sa SM Mega-mall nang tumalon mula sa Building B ang isa ring babae.

Nag-viral sa social media ang pagsu-suicide ng babae na nangyari sa mismong Valentine’s Day.

LIBONG OFWs MAY AIDS

UMAABOT na sa 5,537 ang bilang ng mga overseas Filipino workers na nahawahan na ng HIV. Ito ang dahilan kung bakit naaalarma si ACTS-OFW Rep. Aniceto ‘John’ Bertiz III dahil ang 5,537 ay kumakatawan sa 11% ng kabuuang 52,280 na kaso ng may HIV-AIDS sa listahan ng Department of Health’s National HIV/AIDS Registry na naitala nitong Pebrero 28 lamang. "This is very unfortunate, because if we look at the median age of these OFWs – at 32 to 34 years old – they are actually at the top of their lives in terms of potential workforce productivity," ani Bertiz. Nito lang aniyang nagdaang Enero hanggang Pebrero ng taong ito ay naitala ang 140 OFW na nagpositibo sa HIV kung saan 129 dito ay lalaki at 11 ay babae. Batay sa ulat ng DOH, ang pagkahawa ng nasabing bilang ng OFW ay sa pamamagitan ng pakikipagtalik. Dahil dito, kinalampag ng kongresista ang Department of Labor and Employment na magpakalat ng mga impormasyon ukol sa HIV/AIDS awareness at kung paano ito maiiwasan. Giniit ng mambabatas na makababawas sa paglaganap ng sakit ang mga impormasyon ukol dito dahil ito ang magsisilbing gabay upang makaiwas sa impeksyon ang mga OFW na bantad sa iba't ibang kultura lalo na ang pakikipagtalik sa higit iisang partner. Lalo na aniya ang mga Filipino sailor na sa bawat pagdaong sa iba't ibang pier sa buong mundo ay malaki ang posibilidad na makahanap ng mga babaeng partner na may HIV. Sa kabuuang 5,537 OFWs sa HIV/AIDS registry ng gobyerno lumalabas na 86% rito o 4,763 ay mga lalaki. Ang nakalulungkot aniya ay hindi na ngayon matukoy kung ilan sa mga ito ang dying o maaaring bed ridden na dahil walang track mortality ang DOH dito. Bukod aniya sa nakatalang 52,280 na kabuuang bilang ng may HIV-AIDS ay nasa 2,511 ang namatay at noong nakaraang taon ay may 41 Pinoy ang namamatay buwan-buwan dahil sa nabanggit na sakit.

SIMBAHAN MAY PAALALA SA MGA MAGPEPENITENSYA

Hindi na kinakailangan pa ng mga Katoliko na saktan ang sarili o magpapako sa Krus tuwing panahon ng Mahal na Araw upang ipakita na nagsisisi sila sa kanilang mga kasalanan.

Ito ang ipinaalala kahapon ni  Fr. Jerome Secillano, executive secretary ng Permanent Committee on Public Affairs ng Catholic Bishops’ Conference of the Philippines (CBCP), sa mga mananampalataya kaugnay ng nalalapit na paggunita sa Mahal na Araw.

Ayon kay Secillano, hindi hinihiling ng Simbahang Katoliko sa mga mananampalataya na magpenitensya sa pamamagitan nang pananakit sa sarili at pagpapapako sa Krus para mapatawad sila sa kanilang kasalanan.

Sinabi ng pari na nagawa na ni Hesukristo ang pagpapakasakit sa krus para tubusin tayo mula sa kasalanan at hindi na ito kailangan pang ulitin ng tao.

Paalala pa niya, ang mas mahalaga ay mangumpisal ang mga mananampalataya kung talagang nais nilang pagsisisihan nang taos-puso ang kanilang mga kasalanan at pagkakamali.

Dapat din aniyang manalangin, magnilay at magbalik-loob sa Panginoon sa pamamagitan ng pagmamalasakit at pagtulong sa kapwa.

Una nang sinabi ng mga Obispo ng Simbahang Katoliko na ang katawan ng tao ay sagrado at hindi dapat na abusuhin at saktan.

Ikinalulungkot rin nila na ang pagpapapako at pananakit ng mga tao sa kanilang katawan tuwing Kuwaresma ay nagiging commercial o naging negosyo na dahil naging tourist attraction ito.

80 PORSIYENTO NASA WATCHLIST

Tinatayang 80 porsiyento sa mga miyembro ng Philippine National Police – National Capital Region Police Office ang nasa watchlist ng Counter Intelligence Task Force dahil umano sa pagkakasangkot sa iligal na droga.

Gayunman, nilinaw ni NCRPO chief Director Oscar Albayalde na maaari pang tumaas o bumaba ang nasabing bilang, depende sa magiging resulta ng isinasagawa ngayong pagsisiyasat.

"Nagpapatuloy pa sa ngayon ang ating validation and prosecution efforts ... na bahagi sa kampanya sa paglilinis ng hanay ng ating mga pulis," ani Albayalde.

Nauna nang inihayag ni Albayalde na batay sa paunang imbestigasyon, may mga pulis sa Metro Manila ang pinaniniwalaang sabit sa extortion, kidnap for ransom at illegal drugs.

Sinabi pa ng heneral na sa 29,222 tauhan ng NCRPO, karamihan sa mga nasa watchlist ay may ranggong Police Officer 1 (PO1) at nakatalaga sa Manila Police District, Quezon City Police District (QCPD) at Southern Police District.

"Meron tayong listahan nito, meron tayong watch list dito kaya ito pinaigting natin 'yung counterintelligence operations para ma-weed out pa natin itong mga sinasabing gumagawa pa ng hindi maganda. Sila ang dahilan kaya nadadawit 'yung nakakarami sa amin sa kapulisan," dagdag nito.

Kasabay nito, binanggit pa ni Albayalde na masusi na nilang mino-monitor ang isang pulis na may ranggong PO1 na nagawang makapasok sa PNP kahit may nakabinbin itong kasong kriminal.

LIFESTYLE CHECK SA MGA PARI

Hinimok ng isang Catholic bishop sa kanyang mga kapwa pari na sumailalim sa lifestyle check, kasabay ng paalala na maging tapat sila sa kanilang misyon bilang “alter Christus,” o panibagong Kristo, sa kanilang pang-araw-araw na buhay.
Ayon kay San Carlos Bishop Gerardo Alminaza, chairman ng Episcopal Commission on Seminaries ng Catholic Bishops’ Conference of the Philippines (CBCP), layunin ng hakbang na malaman kung nananatiling tapat ang mga pari sa kanilang misyon.
Paliwanag ng obispo, dapat hayaan ng mga pari na suriin ang kanilang day-to-day activities at kung ilang oras ginagampanan ang responsilibidad, gayundin ang kanilang mga finances at pag-aaring gadgets o kagamitan.
Dapat din aniyang alamin kung paano nakikisalamuha ang mga pari bilang parte ng pagiging saksi ng buhay at gawa ng Diyos.
Kamakailan, may 120 mga pari ang nagtipon sa Maryhill School of Theology sa Quezon City, sa idinaos na National Discernment of Priests on their Prophetic Role na inorganisa ng National Clergy Discernment Group.

SUPPORT THE BUZZ

We have come up to the point of facing odds in our quest and purpose to sustain good blogging.  Even without website, we try to see it that we write information,  entertainment and knowledge to our viewer.
Blogging is passion, anchored from commitment,  but still financial issue is a vital concern.
In view of these,  please bear with us if we are not able to post regularly but as soon as we fixed monetary woes,  rest assured you can read us every day.
We hope to get some sponsorship from our prospects to make our mission and vision fruitfully done.
Thank you for taking precious moment of your time being with us.

PEKENG TRABAHO ABROAD NAGKALAT

Pinayuhan ng Philippine Overseas Employment Administration (POEA) ang mga manggagawang Filipino na kasalukuyang nagtatrabaho sa ibang bansa na mas maging maingat sa pagtanggap ng alok na trabaho mula sa ibang bansa o 'third country.'

Ito’y matapos na makatanggap ng report ang POEA na may mga Filipino household service workers (HSWs) sa Hong Kong, Singapore at Cyprus ang inaalok na lumipat sa ibang bansa tulad ng Dubai, Mongolia, Turkey at Russia ngunit kinalaunan ay kanilang malalaman na hindi pala maganda ang kondisyon ng kanilang trabaho, o ang malala ay hindi pala totoo ang alok na trabaho.

Ang mga nagre-recruit ay mula sa mga third world country na may mga kasabwat na Filipino sa kanilang iligal na gawain.

May mga natanggap na report na may mga manggagawang nabiktima at nagbayad ng malaking halaga at nagbiyahe sa mga third world country gamit ang tourist visa at walang katiyakan na may employer na naghihintay sa kanila.

May natanggap din na report na may mga nakahanap na trabaho subalit sila ay nakararanas ng pang-aabuso mula sa kanilang employer at ang kawawang manggagawa, dahil sa kakulangan ng tamang dokumento ay inaaresto  at pinade-deport ng immigration authorities.

Ang pagre-recruit sa pamamagitan ng third country ay itinuturing na illegal recruitment kung ang recruiter o ang employer ay walang awtorisasyon mula sa pamahalaan ng Pilipinas.

Para sa kanilang pansariling proteksiyon, ang aplikante para sa trabaho sa ibang bansa ay nararapat na may wastong work permit o visa o employment contract na inaprubahan ng Philippine Overseas Labor Office (POLO) at prinoseso ng POEA bago sila umalis ng bansa.

SEAMAN NAGOYO SA MALL

PAALALA sa mga galing abroad ang sinapit ng isang seaman na matapos umanong paamuyin ng gamot na pampahilo ay napapayag na bumili ng mga produktong nagkakahalaga ng mahigit P60,000 sa isang mall sa Caloocan City.

Dumulog sa himpilan ng pulisya si Lorrie Bacuta, 36, ng Block 33, Lot 23, Area 2, Brgy. North Bay Boulevard South (NBBS), Navotas City upang personal na magsampa ng reklamo.

Ayon kay Bacuta, namamasyal siya sa Victory Mall sa Monumento dakong alas-8 ng gabi nang harangin siya ng isang babaeng kawani ng Michikiwa Enterprise at pilit na pinapasok sa isang stall para alukin ng kanilang mga produktong herbal at pang-masahe.

Habang ipinakikilala ang kanilang produkto, minamasahe umano siya ng isang kawani hanggang may ipinaamoy sa kanya ang babae na naging dahilan upang makaramdam siya ng matinding pagkahilo.

Hindi maipaliwanag ni Bacuta kung paano nakuha sa kanya ang ATM card at nagawang ma-withdraw ang halagang P62,900 na kabayaran sa mga binili raw niyang produkto.

Bumalik lamang sa tamang katinuan si Bacuta nang makalabas na siya ng stall at maalala ang salaping nakuha sa kanya kaya kaagad niyang binalikan ang tindahan, subalit, hindi na pumayag na isoli ang produkto at sa halip ay itinawag pa siya ng taksi na maghahatid sa kanya pauwi at dito na rin isinakay ang binili raw niyang mga produkto.

Pinayuhan pa raw siya na bumalik na lamang kinabukasan, subalit, nang bumalik nga siya upang isoli ang mga produkto ay hindi na pumayag ang may-ari dahilan upang maghain na siya ng reklamo sa pulisya.

Maliwanag na modus operandi ng nasabing tindahan ang mambola at kapag nalito na ang parukyano ay doon lalansihin para mapapayag na bumili ng produkto.

NAKONSENSIYANG PULIS, NAG-SUICIDE

Binagabag ng konsensiya o napahiya?
Ito ang tinitingnang dahilan ng pagpapatiwakal ng isang pulis na kinasuhan dahil sa pagpatay sa inaresto nilang 64-anyos na lola sa Ormoc City.

Ayon kay Police Supt. Carlito Gallardo, acting chief ng Ormoc City police station 1, iniimbestigahan pa ang umano'y pagpapatiwakal ni PO3 Eleazar Tero, intelligence officer ng kanilang tanggapan na nasibak kamakailan sa pwesto dahil sa nabanggit na kaso.

Base sa report, nagpatiwakal si Tero sa bahay nito sa Baranggay Curva kung saan natagpuan itong nakabitin gamit ang lubid.

Sinabi pa ni Gallardo, patuloy pa nilang inaalam kung ano ang dahilan ng suicide ni PO3 Eleazar bagaman mismong ang pamilya nito ang nakaaalam umano sa tunay na dahilan.

Si Tero ay isa sa walong pulis mula sa Ormoc City police station 1 na sinibak sa pwesto matapos masampahan ng kasong murder at arbitrary detention dahil sa pagkakasangkot sa pagpatay sa biktima.

Una nang na-relieve ang station commander na si Chief Insp. Omar Cartalla, kasama sina PO2 Ernie Clemencio, PO1 Ritchie Sy at PO1 Ryan Refuerzo.

Ang naturang reklamo ay nag-ugat sa pagkakapatay sa umano’y bigtime swindler na si Lorna Soza na nakita ang bangkay na binalot ng packing tape.

Si Chief Insp. Shevert Alvin Machete, hepe ng Kanangga police ang mismong nagsampa ng kaso sa mga sangkot na pulis.
Ayon sa ulat, bago natagpuan sa damuhan ng Barangay Naghalin sa Kananga, Leyte ang bangkay ng matandang si Soza ay nakita ito ng ilang saksi na dinampot ng mga pulis at isinakay sa isang patrol car.
Patuloy pang iniimbestigahan ang insidente.

OFWs SA GUAM PINAG-IINGAT

Pinaalalahanan ng Philippine Overseas Employment Administration (POEA) ang mga overseas Filipino worker (OFW) na nasa Guam na manatiling kalmado at mag-ingat.

Ito'y sa gitna na rin ng pagbabanta ng People’s Democratic Republic of Korea na pasasabugin ang mga teritoryo ng Amerika.

“Matapos ang konsultasyon kasama ang Department of Foreign Affairs, walang inilabas na travel restriction sa mga manggagawang Filipino ngunit sila ay pinayuhan na mag-ingat sa kanilang pananatili sa Guam,” nakasaad sa Resolution No. 04, na inisyu ng POEA Governing Board.

Nauna rito, isinailalim na ng DFA ang Guam sa ilalim ng Crisis Level 1, Precautionary Phase, dahil sa pagbabanta ng People’s Democratic Republic of Korea na magpapasabog sila ng nuclear missile laban sa Guam.

Pinayuhan rin nito ang mga OFWs na i-monitor ang balita mula sa mga mapagkakatiwalaang mamamahayag at sa mga opisyal na pahayag mula sa pamahalaan ng Guam, at isa iba pang awtoridad ng US, gayundin mula sa Philippine Consulate General.

Kaugnay nito, inatasan na ni Labor Secretary Silvestre Bello III, na siya ring chairman ng POEA Governing Board, ang International Labor Affairs Bureau na bantayan ang sitwasyon at ipaalam sa kanya ang lagay ng mga OFW sa Guam.

Nakahanda na rin ang contingency plans, pati na ang pagpapauwi sa mga OFW kung kinakailangan, sakaling hindi na magiging ligtas ang mga Filipino sa Guam at South Korea.

“Handa kami sa anumang pangangailangan dahil isinasaalang-alang namin ang kaligtasan ng ating mga kababayan.  Ngunit sa ngayon, nananatiling normal pa ang sitwasyon doon (sa Guam at South Korea) at wala pa kaming natatanggap na hiling na repatriation,” ani Bello.

Nabatid na bukod sa pagpapauwi, may nakahanda ring tulong ang Overseas Workers Welfare Administration (OWWA) para sa mga OFW na uuwi mula sa Guam at South Korea.

BABALA: TRABAHO SA GERMANY, PEKE

Mahigpit na pinaalalahanan ng Philippine Overseas Employment Administration (POEA) ang mga manggagawang Pinoy na nais magtrabaho sa ibayong dagat laban sa mga iniaalok na trabaho para sa healthcare professional sa bansang Germany.

Ang babala ng POEA ay kasunod na rin ng natanggap na report na may isang “Meine Agentur 24” na umano’y nagre-recruit ng mga nurse at iba pang healthcare professional sa Germany ngunit natuklasang peke naman ang naturang job posting.

Ayon sa ulat ng Embahada ng Pilipinas sa Berlin, hindi matatagpuan sa online registry of businesses sa nasabing bansa ang naturang recruiter.

Wala ring nakuhang record ng Meine Agentur 24 recruiter mula sa kanilang database para sa listahan ng kanilang lehitimong accredited foreign employers.

Sinasabi na ang website at Facebook page ng Meine Agentur 24 ay may anunsiyo na kumukuha sila at tumatanggap ng aplikante para sa trabahong nurse at healthcare at nag-aalok din ng kurso para sa nursing staff bilang paghahanda sa kanilang pagtatrabaho sa Germany.

Sinisingil umano ng kompanya ang mga aplikante ng €5,425 para sa kanilang pag-aaral ng German language at nursing school training.

Iniulat din na ang aplikante raw ang kukuha at magbabayad ng kanilang sariling visa at may €5,360 sa kanilang bank account para sa gastusin sa kanilang 20-buwang pamamalagi sa Germany, kasama na ang gastos sa pagkain, tirahan, damit at transportasyon.

Paalala naman ng POEA sa mga Pinoy job seekers, huwag magpabiktima sa mga iligal na recruiter at mag-aplay lamang sa pamamagitan ng Triple Win Project o sa mga lisensiyadong Philippine recruitment agencies.

Maaari rin anilang i-beripika ng mga aplikante kung lehitimo ang recruitment agency sa  POEA website http://www.poea.gov.ph/services/recruiters.html.