TAKOT SA DENGUE VACCINE PINAHUPA

Sinugpo ng Malacañang at Department of Health (DoH) ang takot ng publiko  sa kontrobersyal na dengue vaccine ng kompanya Sanofi Pasteur.

Sinabi ni Presidential Spokesman Harry Roque na walang dapat ipangamba ang mga magulang ng mga batang naturukan ng degue vaccine dahil wala itong masamang epekto, taliwas sa mga kumakalat na impormasyon.

Ayon kay Health Assistant Sec. Lyndon Lee Suy, lumawak nang husto ang kontrobersya at hindi na nakatuon sa isyu ng Dengvaxia.

Inanunsiyo ni Asec. Suy na magandang balita nga dahil siyam sa 10 nabakunahang nagka-dengue na ay hindi na ulit magkakaroon ng dengue infection habang isa lamang sa 10 nabakunahang hindi pa nagka-dengue ay may tsansang magkaroon ng matinding dengue na may sintomas na paglalagnat at pagkaroon ng pasa.

Dahil dito, wala raw  dapat ikabahala ang mga magulang ng mahigit 700,000 mga batang nabakunahan ng Dengvaxia sa buong bansa.

Wala ring natatanggap na ulat ang Sanofi Pasteur na may kaso ng pagkamatay sa mga naturukan ng Dengvaxia.

Sa ulat, ipinabatid ni Dr. Ruby Dizon, medical director ng Sanofi Pasteur, walang report   na nakukuha ang kanilang kumpanya gaya ng  impormasyon ng Department of Health.

Aniya, nagkaroon ng pagtatasa ang grupo ng mga eksperto at sa pag-aaral ay walang naapektuhan ng isinagawang pagbabakuna.

Sagot ito ng Sanofi sa inilabas na pahayag ng Volunteers Against Crime and Corruption (VACC) na tatlong bata ang nasawi sa Central Luzon matapos tumanggap ng bakuna laban sa dengue.

Sinabi na ng Sanofi na ang Dengvaxia ay makatutulong sa bata na tinamaan na ng dengue.

Gayunpaman, kung ang naturukan nito ay hindi pa nagkakaroon ng dengue ay maari itong makaranas ng “severe disease”.

Hindi naman ibig sabihin nito na maaring magdulot ng pagkamatay o grabeng kondisyon ang bakuna. Ito ang paliwanag ng Sanofi sa kanilang inihayag na magdudulot ng “severe diseases” ang Dengvaxia kung ang batang naturukan nito ay hindi pa nagkaka-dengue.

Lumitaw na ang “severe” na tinutukoy ay mas matagal na lagnat, mababang platelet count, magkaroon ng pasa kapag nauntog at makaranas ng balinguyngoy kapag nainitan.

Mga sintomas umano ito na nasa ilalim ng classification bilang “severe dengue symptoms”.

Ayon kay Sta. Ana, walang naitatalang kaso ng dengue shock syndrome at wala ring namatay.

Sa iba pang kaganapan, maaai umanong maharap sa kaso ang Sanofi Pasteur. Ayon kay Health Secretary Francisco Duque III, posibleng mayroong pananagutan ang kumpanya at binubusisi na ng legal services group ng DOH ang kontrata sa Sanofi para malaman ang detalye nito.