Walang problema sa Marawi rehab fund

Pinalis ni Task Force Bangon Marawi Chairman Eduardo del Rosario ang pangamba ng mga taga-Marawi na baka kapusin ang pondong ibinigay ng Senado para sa rehabilitasyon sa kanilang lugar.

Matatandaang binigyan lamang ng Senado ng P10 billion ang gobyerno para sa rehabilitasyon sa Marawi City.

Tantiya noon ilang lokal na opisyal ng Marawi na baka abutin ng P90 billion ang kailangang pondo para maitayong muli ang lungsod.

Kinlaro ni Del Rosario na inisyal pa lamang naman ang ibinigay na P10 billion ng Senado sa Task Force Bangon Marawi at hindi pa naman natatapos ang ginagawa nilang post-conflict needs assessment (PCNA) o ang pagtukoy sa kabuuang halagang kailangan sa rehabilitasyon.

Aniya, sa sandaling makuha ang report ng PCNA, ipapasok ito sa local government unit at provincial master development plans, isusumite sa validation ng National Economic and Development Authority at ito ang maglalabas ng “final and total comprehensive rehabilitation and reconstruction plan.”

May nakalaang hiwalay na pondo ang gobyerno para maidagdag sa rehabilitation plan sa Marawi kung kukulangin ang inisyal na P10 billion.

Kailangan lamang hilingin ni Pangulong Rodrigo Duterte sa Department of Budget and Management na magpalabas ng dagdag na pondo at wala naman daw magiging problema rito.